मुंबई महापालिका निवडणुकीत भाजप आणि Shiv Sena (शिंदे गट) यांना बहुमत मिळाले असले, तरी सत्ता स्थापनेसाठी परस्परावलंबन स्पष्ट झाले आहे. शिंदेंच्या मदतीशिवाय भाजपला एकहाती सत्ता स्थापन करता येणार नाही, तर ठाकरे गट सत्तेपासून दूरच आहे. मात्र या राजकीय समीकरणांच्या पार्श्वभूमीवर एकनाथ शिंदेंनी मोठी रणनीती आखल्याची चर्चा सुरू झाली आहे.
शिंदे गटातून विजयी झालेले 29 नगरसेवक पुढील तीन दिवस हॉटेलमध्ये ठेवण्यात येणार आहेत. वांद्रे येथील Taj Lands End येथे या नगरसेवकांचा मुक्काम असणार असून, आज संध्याकाळी सर्वांना तिथे उपस्थित राहण्याच्या सूचना देण्यात आल्या आहेत. महापौर निवड होईपर्यंत हॉटेलमध्येच थांबण्याचे आदेश देण्यात आले असल्याचे सूत्रांकडून सांगण्यात येते.
ठाकरे गटाकडून ‘दगाफटका’ची भीती?
शिंदे गटातील काही नगरसेवकांनी पूर्वी Uddhav Thackeray यांच्यासोबत काम केले आहे. त्यामुळे ऐनवेळी ठाकरे गटाकडून नगरसेवक फोडून सत्ता स्थापनेचा दावा होऊ शकतो, अशी भीती शिंदे गटात असल्याची चर्चा आहे. हीच शक्यता लक्षात घेऊन नगरसेवकांना एकत्र ठेवण्याची खबरदारी घेतली जात असल्याचे बोलले जात आहे.
भाजपपासूनही अंतर ठेवण्याची चाल?
एका मतप्रवाहानुसार, ही खेळी केवळ ठाकरे गटापासूनच नव्हे तर भाजपपासूनही आपल्या नगरसेवकांना लांब ठेवण्यासाठी आखली गेली आहे. महापौर भाजपचा होणार असला, तरी शिंदे गटाच्या नगरसेवकांशिवाय ते शक्य नाही. त्यामुळे भाजपसोबत कठोर बोलणी करून मुंबई महापालिकेत सत्तेतील मोठा वाटा मिळवण्यासाठी शिंदेंची ही रणनीती असल्याचे सांगितले जात आहे. मात्र, शिंदे गटाने अधिक ताण दिल्यास भाजपकडूनही फोडाफोडीची शक्यता नाकारता येत नाही, अशीही चर्चा आहे.
महापौरपदावर शिंदे गटाचा दावा?
मुंबईचा महापौर शिवसेनेचाच (शिंदे गट) व्हावा, अशी जोरदार मागणी पक्षात होत आहे. कमी जागा असतानाही भाजपने एकनाथ शिंदेंना मुख्यमंत्रिपद दिले होते, मग मुंबईचे महापौरपद देण्यात अडचण काय? असा सवाल शिंदे गटात उपस्थित केला जात आहे. त्यामुळे आगामी दिवसांत महापौरपदावर थेट दावा शिंदे गटाकडून मांडला जाण्याची दाट शक्यता वर्तवली जात आहे.
राजकीय हालचालींनी वेग घेतलेल्या मुंबईत, महापौर निवडीपर्यंतची ही ‘हॉटेल डिप्लोमसी’ सत्तासमीकरणे कशी बदलते, याकडे सर्वांचे लक्ष लागले आहे.
