उन्हाच्या झळांत नागरिकांना दिलासा; किशोर बेलसरे यांच्या वाढदिवसानिमित्त सार्वजनिक प्याऊ सुरू
कन्हानमध्ये सामाजिक बांधिलकी जपत विविध उपक्रमांचे आयोजन
कन्हान, ता. ८ – सुनील सरोदे
वाढत्या उन्हामुळे नागरिकांना भेडसावणाऱ्या पिण्याच्या पाण्याच्या समस्येची दखल घेत कन्हान येथील सामाजिक कार्यकर्ते किशोर बेलसरे यांच्या वाढदिवसानिमित्त सार्वजनिक पाणी प्याऊ सुरू करण्यात आले. आंबेडकर चौक येथे झालेल्या या उपक्रमामुळे प्रवासी, कामगार, विद्यार्थी तसेच नागरिकांना उन्हाळ्यात मोठा दिलासा मिळणार आहे.
कन्हान शहरात दिवसेंदिवस तापमानात वाढ होत असून दुपारच्या वेळेत नागरिकांना पिण्याच्या पाण्यासाठी भटकंती करावी लागत आहे. ही गरज ओळखून गुरुवारी सायंकाळी ५ वाजता आंबेडकर चौक येथे सार्वजनिक पाणी प्याऊचे लोकार्पण करण्यात आले. या वेळी सुनील लाडेकर, अशोक हिंगणकर, गणेश पानतावणे, नरेंद्र वाघमारे, पुरंदास तांडेकर, श्रीराम नांदुरकर आदी मान्यवर उपस्थित होते.
उपस्थितांनी सामाजिक उपक्रमांच्या माध्यमातून नागरिकांना मदत करण्याची भावना जपली पाहिजे, असे मत व्यक्त केले. उन्हाळ्यात नागरिकांना स्वच्छ व थंड पाणी उपलब्ध करून देण्याचा हा प्रयत्न कौतुकास्पद असल्याची भावना उपस्थितांनी व्यक्त केली.
