बॉयपास रोडलगतच्या शेतातील विहिरीत अज्ञात महिलेचा मृतदेह आढळल्याने खळबळ

हत्या की अपघाती मृत्यू?; शवविच्छेदन अहवालानंतरच उलगडणार रहस्य

कन्हान,ता.०४

कन्हान पोलीस ठाण्याच्या हद्दीतील नागपूर बायपास रोड व नागपूर-हावडा रेल्वेमार्गालगत असलेल्या खंडाळा शिवारातील एका शेतातील विहिरीत अज्ञात महिलेचा मृतदेह आढळून आल्याने परिसरात एकच खळबळ उडाली आहे. मृत महिला अल्पवयीन की प्रौढ, याबाबत अद्याप स्पष्ट माहिती समोर आलेली नसून पोलीस तपास सुरू आहे.

मिळालेल्या माहितीनुसार, गुरुवारी (ता. ४) दुपारच्या सुमारास शेतमालक रमेश अग्रवाल यांच्या शेतातील निर्जन विहिरीत एक मृतदेह तरंगताना शेजारील गोट फार्मचे मालक विनोद यादव यांच्या मजुराच्या निदर्शनास आला. याबाबत तातडीने कन्हान पोलिसांना माहिती देण्यात आली. माहिती मिळताच पोलिसांनी घटनास्थळी धाव घेत पाहणी केली.

विहिरीतील मृतदेह बाहेर काढण्यासाठी पोलीस मित्र अनिल आंबागडे यांची मदत घेण्यात आली. त्यांच्या सहकाऱ्यांच्या मदतीने मृतदेह बाहेर काढून टाटा एस वाहनाद्वारे उपजिल्हा रुग्णालय, कामठी येथे शवविच्छेदनासाठी पाठविण्यात आला.

मृतदेह फुगलेल्या व कुजलेल्या अवस्थेत असल्याने ओळख पटविणे कठीण झाले आहे. महिलेच्या अंगावर तपकिरी रंगाचा सलवार आढळून आला असून पायजमा नसल्याची माहिती सूत्रांनी दिली. दरम्यान, विहिरीलगत असलेल्या एका ओसाड घरात दुपट्टे व इतर साहित्य आढळून आल्याने विविध तर्कवितर्कांना उधाण आले आहे.या प्रकरणात हत्या, आत्महत्या अथवा अन्य कोणती घटना घडली याबाबत सध्या कोणतेही अधिकृत निष्कर्ष समोर आलेले नाहीत. पोलिसांनी सर्व शक्यता तपासण्यास सुरुवात केली असून मृतदेहाची ओळख पटविण्याचे प्रयत्न सुरू आहेत.

घटनेमागील नेमके सत्य शवविच्छेदन अहवाल व पोलीस तपासानंतरच स्पष्ट होणार असल्याने संपूर्ण परिसराचे लक्ष आता तपासाच्या निष्कर्षाकडे लागले आहे. कन्हान पोलीस पुढील तपास करीत आहेत.